စစ်ကိုင်း(သို့မဟုတ်)လူရိုးတို့၏ အညာမြေနှင့် KIA ၏ ဗျူဟာမြောက် အမွှေဇာတ်လမ်း

စာမရေးဖြစ်တာလည်း  ကြာပါပြီ   ။   ယနေ့  ယမ်းခိုးနံ့ တသင်းသင်းနဲ့ စစ်ကိုင်းမြေအကြောင်း  တွေးရင်း  စာရေးချင်စိတ်  ဖြစ်လာလို့  ချရေးဖြစ်ပါတယ်  ...  ။ 

ကျနော်  အမှန်အတိုင်း ဝန်ခံရရင်  ၂၀၂၁  နိုင်ငံရေးဖြစ်စဉ်ကြီးရဲ့  အစမှာ   စစ်ကိုင်းတိုင်းကို  ယခုလောက်ထိ ဆိုးဝါးသွားလိမ့်မယ်လို့ ကျနော် လုံးဝ တွေးထင်မထားခဲ့ပါဘူး   ..  ။   

အညာဒေသမို့   သွေးပူသွေးဆူလွယ်ပြီး   ဒေါသထွက်ရင်  ထန်းရည်သောက်ရင်းတောင်   ထန်းလက်ပြားနဲ့  ထ ရိုက်သတ်တတ်ကြတဲ့  အညာသား  လူရိုးကြီးတွေနေတဲ့  ဒေသဆိုတာတော့   သိထားပါတယ်  ..  ။  ဒါပေမဲ့    မြန်မာပြည်ရဲ့  ဒုတိယအကြီးဆုံး ဆန်အိုးကြီးဟာ    အခုလို  ဟက်တက်ကြီး  ကျကွဲသွားလိမ့်မယ်လို့  အထိတော့     ကျနော်  မမျှော်လင့်မိရိုး  အမှန်ပါ   ..  ။ 

အခုတော့   ဖြစ်ပုံတွေက  အပျက်အပျက်နဲ့   နှာခေါင်းသွေးထွက်ရင်း   ၂  ဖက်အမှားတွေနဲ့  အကြောင်းတရားတွေက    စစ်ကိုင်းမှာ  ပေါင်းဆုံသွားပါပြီ  ..  ။   ဘေးကနေ   လောင်းကျွမ်းမှုကို အားပေးမဲ့ ဒြပ်ပစ္စည်းတွေကလည်း   ယခုအထိ   တပုံတပင် ရှိနေဆဲပါဘဲ   ..   ။  

၂၀၂၁   နှစ်ဆန်း    တနိုင်ငံလုံး   ဆန္ဒပြပွဲတွေ အရှိန်မြင့်နေစဉ်အတွင်း   ဧပြီလောက်တုန်းက  ကျနော်နဲ့ အရမ်းရင်းနှီးတဲ့  ( facebook မှာလည်း  သူ့ Acc ကို  လူသိများတဲ့ )   Senior  အကိုကြီး တစ်ယောက်နဲ့  ဆွေးနွေးခဲ့ဖူးပါတယ်  ။  သူပြောတဲ့အချိန်က  အဲ့ဒီတုန်းက   အတော်ကို စောပါတယ်  ။    NUG  /  PDF   တွေရဲ့   လက်နက်ကိုင်လမ်းစဉ်တောင် အတိတလင်း  မစသေးဘဲ  အစပျိုးဖို့ တာဆူနေတဲ့  အချိန်ပါ  ..  ။ 

သူပြောတာက   ..
"    ညီလေး  ..   စစ်ကိုင်းက  သူတို့ရဲ့ အခြေခံနယ်မြေ ဖြစ်လာလိမ့်မယ်  ၊  ချစ်တွင်းနဲ့  ဧရာဝတီကြား  မြစ်ဝှမ်းကို  မင်း  သတိထားကြည့်နေ   ..  ။   အဲဒီဖက်က ဗမာတွေ  ရိုးကြတယ်  ..  ဘာမှ မသိဘူး  ၊  သူတို့  အကြီးအကျယ်  သူပုန်ထလိမ့်မယ်  "   တဲ့   ..  ။    
ကျနော်  အစက  အဲဒီ အကိုကြီးပြောတာကို  မယုံခဲ့ပါဘူး   ။   မယုံကြည်လောက်တဲ့ အကြောင်းရင်းကလည်း  ကျနော့်မှာ ယူဆချက်  ခိုင်ခိုင်မာမာ ရှိပါတယ်   ။  

( ပထမအချက်က ) 👉🏻  
ကျနော်တို့  တွေးလေ့ရှိတဲ့  သမားရိုးကျ တွေးဆချက်မှာ  -
နယ်မြေဒေသတစ်ခု   ၊   လူမျိုးတစ်ခု   သူပုန်အကြီးအကျယ်ထဖို့အတွက်    သူပုန်ထမဲ့  ဧရိယာက   ..  မိမိတိုင်းပြည်နဲ့  ပလဲနံပ   မသင့်တဲ့ / မတည့်တဲ့ ( Non Allied Country ) ပြည်ပ ကျောထောက်နောက်ခံ  နယ်မြေတစ်ခုခုနဲ့   ဆက်စပ်နေရမယ်ဆိုတဲ့   ကျနော့်ရဲ့   လှေကြီးထိုးရိုးရိုး  တွေးဆချက်ပါ   ။  

သမားရိုးကျအရတော့  ကျနော့်ရဲ့  ဒီတွေးဆချက်က  မမှားပါဘူး  .. ။  စစ်ကိုင်းဒေသက  အိန္ဒိယနဲ့  ဆက်စပ်နေတာပါ  ။   ဒါပေမဲ့  ဒီအချိန်မှာ  အိန္ဒိယနဲ့  မြန်မာ SAC အစိုးရကြား    ဆက်ဆံရေးက   ပြေပြစ်တယ်လို့ ပြောလို့ရပါတယ်  ။  
ယခုအချိန်မှာ  မြန်မာ့အရေးကို  အိန္ဒိယက  လက်ရှောင်နေတာ ဖြစ်လို့    စစ်ကိုင်းဟာ   ဒီလောက်ထိ  ဖြစ်သွားစရာ မရှိဘူးလို့လည်း    ကျနော် စစ်ကိုင်းကို  အထင်ပေါ့ခဲ့ပါတယ်  ။   ဒါက   ပထမအချက်ပါ  ။ 

နောက်  ( ဒုတိယချက်က ) 👉🏻  ..  စပါးစိုက်တဲ့ လယ်သမားကြီးတွေ  ထွက်လေ့ရှိတဲ့  ၊  ရိုးသားကြတဲ့  ရှေးဗမာတို့ရဲ့  ဘူမိနက်သန် စစ်ကိုင်းသားတွေဟာ  သူတို့ရဲ့  ရှိထားပြီးသား  အေးချမ်းတည်ငြိမ်မှု နဲ့  တဒင်္ဂ နိုင်ငံရေးလိုဘတစ်ခုကို  ပဲကြီးလှော်နဲ့ အိုးပုတ်လဲသလို   အလွယ်တကူ  လဲ မပစ်နိုင်ဘူးလို့   ကျနော်  ယူဆထားလိုက်လို့ပါဘဲ  ...  ။     ဒါကတော့  စစ်ကိုင်းသား ရှေးမြန်မာကြီးတွေက သက်ဆင်းလာတဲ့   မျိုးဆက်ရဲ့  နိုင်ငံရေးရေချိန်ကို   ကျနော်  အထင်ကြီးထားမိလိုက်တဲ့  အချက်ပါ  ..  ။  

ကျနော်  အတွေး  လွတ်ချော်ခဲ့တာတွေလည်း  ရှိပါတယ်    ။  
အဲဒါက   မြန်မာ့သမိုင်းမှာ   စစ်ကိုင်းသားတွေဟာ   လူစုပြီး  ညီပြီဟေ့  ဆိုရင်   ကုန်းဘောင် Dynasty  ကိုတောင်   စစ်ကိုင်းက  ရှေးဗမာတောသားကြီးတွေ စုပြီး    မန္တလေးတောင်ခြေအထိ   ဆင်းပြီး   တည်ထောင်ခဲ့ကြဖူးတယ်ဆိုတဲ့ အချက်ပါ   ။  

ရှေးမြန်မာကြီးတွေက  ဆင်းသက်လာတဲ့  ဇာတိသွေး၊ ဇာတိမာန်ကို  သူတို့ရဲ့  အသွေးအသားမှာ   ယနေ့အထိ  မြင်ရလေ့ ရှိတတ်ပါတယ်  ..  ။    ယခုတော့ နိုင်ငံရေး  အမြင်မတူမှုတွေကြား   ဗမာအချင်းချင်း  သွေးချောင်းစီးရင်း    ခုတော့  စစ်ကိုင်းဟာ   ရေတိမ်နစ်ခဲ့ပါပြီ   ..   ။   စစ်ကိုင်းသားအစစ်   ဦးအောင်ဇေယျသာ တမလွန်က ကြားရင် ရင်ကွဲရချည့်လေ   ..  ။ 

စကားဆက်ရရင်  ..  ကျနော် အဲဒီအချိန်တုန်းက   ဆွေးနွေးဖက် အကိုကြီးနဲ့  ဆွေးနွေးစဉ်   ..    ကျနော့်  စဉ်းစားချက်မှာ   မတွေးထားမိတဲ့ အချက်တစ်ချက်လည်း  ရှိပါသေးတယ်   ။   အဲဒါကတော့   စစ်ကိုင်းဟာ   KIA  ကြီးစိုးတဲ့  ကချင်ဒေသရဲ့  ဝင်ပေါက်ဆိုတာကို   ထည့်  မစဉ်းစား မိတာပါဘဲ   ။

ကျနော်  အပေါ်မှာ ပြောခဲ့ပါတယ်  ။   နယ်မြေဒေသတစ်ခု(ဝါ) လူမျိုးတစ်ခု သူပုန်ထဖို့   Non-allied  Country  နိုင်ငံတစ်ခုနဲ့  နယ်မြေဆက်စပ်နေရမယ် ဆိုတဲ့  စဉ်းစားချက်မှာ  KIA   ကို  သာမာန်  Insurgent group  တစ်ခုအနေနဲ့သာ ဖော့  စဉ်းစားမိတဲ့ အချက်က  ကျနော့် ယူဆချက်တွေကို  အကြီးအကျယ်  မှားယွင်းစေခဲ့ပါတယ်  ။     တကယ်တော့   KIO  KIA   ဟာ  မြန်မာ့နိုင်ငံရေး မှာ    ဂွင်တွေ့ရင်   မဟာဗျူဟာ  ဝင်ကစားတတ်တဲ့  ကျားအဆင့်  သူပုန် ဖြစ်နေတာ  ကြာပါပြီ   ။ 

အခုနောက်ပိုင်းမှ  အပြန်ပြန် အလှန်လှန် ၊ တစိမ့်စိမ့်  ပြန်တွေးကြည့်တဲ့အခါ    KIA  ဟာ  စစ်ကိုင်းဒေသ တစ်ခုလုံး  မီးဟုန်းဟုန်း  တောက်ဖို့    စနစ်တကျ  လုပ်သွားတယ်ဆိုတာ  ပိုမိုပြီး   ပေါ်လွင်လာပါတယ်   ...  ။    ဒါကို   ကျနော်  အကျိုးအကြောင်းနဲ့  ဆက်ရေးပြပါ့မယ်   ။   

KIO / KIA  ဟာ  အနောက်နဲ့ရော .. ၊  တရုတ်နဲ့ပါ  ခွချက်တတ်တဲ့  မဟာဗျူဟာ သဘာဝ  ရှိတယ်ဆိုတာ  အရင်က  Post  တွေမှာ  ကျနော်  ရေးခဲ့ဖူးပါတယ်   ။   ဒါကြောင့်  ဒီ  ၂၀၂၁  ဖြစ်စဉ်ကြီးမှာ    KIA  ရဲ့ အကြီးအကျယ်  ပါဝင် ပတ်သတ်မှုကြီးကို   အထွေအထူး  ရေးပြစရာ  မရှိပါဘူး  ( အားလုံး  သိပြီးသားမိုလို့ပါ )   ။   မိသမျှ လက်နက် ၊  မိသမျှ ခဲယမ်း   KIA  စက်ရုံထုတ်တွေချည်း ဖြစ်နေတာ  မြင်သာပါတယ်   ။  

ဒါ့ကြောင့်     မဟာဗျူဟာအရ  ၊  နိုင်ငံရေး/စစ်ရေးအရ   စစ်ကိုင်းဒေသကို မီးရှို့ခြင်းအားဖြင့်   KIA   အတွက်   အကြီးအကျယ်  အမြတ်ထွက်စေတဲ့  အချက်တွေကို  အချက်ကြီး(၃)ချက်နဲ့    ကျနော်တို့  ဖော်ထုတ် ဆန်းစစ်ရအောင်ပါ  ..  ။ 

💥💥💥💥💥💥💥💥💥💥

(၁) အချက်  ။   စစ်ကိုင်းကို  စစ်မီးမွှေးပေးခြင်းအားဖြင့်  ကချင်ဒေသသို့ ထိုးဖောက်ထားတဲ့  မြန်မာ့တပ်မတော်ရဲ့  ဆက်သွယ်ရေးလမ်းကြောင်းများကို  ဖြတ်တောက်နိုင်ခြင်း  
✍🏻️✍🏻️✍🏻️✍🏻️✍🏻️✍🏻️✍🏻️✍🏻️✍🏻️
ဒီအချက်က  KIA  အတွက်  အရေးကြီးပါတယ်  ..  ။   မြန်မာ့တပ်မတော်  အင်အားကြီးလာတိုင်း  သူ့ကို ထိုးစစ်ကြီးတွေ  ထထ, ဆင်နွှဲတတ်တဲ့ အလေ့အထကို  သူ နှစ်ပေါင်းများစွာ  နာလိုခံခက်  ဖြစ်နေတာ ကြာပါပြီ   ။   ၂၀၁၂   ကချင်ဒေသတိုက်ပွဲများနောက်ပိုင်း   သူတို့ဌာနချုပ်  လိုင်ဇာပတ်လည်   နယ်မြေအများအပြား  စွန့်လွှတ်ရတာကိုလည်း   KIA   ဟာ  မီးခဲ ဖင်ခု  ဖြစ်နေခဲ့ပါတယ်   ။    ဒါ့ကြောင့်    ၂၀၂၁  အရေးအခင်းဟာ  သူ့အတွက်တော့   မြန်မာ့တပ်မတော်ကို  ဂလဲ့စားချေဖို့   တကယ့်  ဂွင်ကောင်းပါဘဲ    ။   

ကချင်ဒေသကို  ပြည်မကနေ  အဓိကအဝင်လမ်းက   ၃  လမ်းပဲ ရှိပါတယ်  ။  
ဒီလမ်းတွေဟာ   တနည်း-မြန်မာ့တပ်မတော်က  KIA  ကို ထိုးစစ်ကြီးတွေ  ဆင်နွှဲရာမှာ အသုံးပြုတဲ့  အဓိက  ဆက်သွယ်ရေးလမ်းကြောင်းကြီးတွေလည်း  ဖြစ်ပါတယ်   ။  

အဲဒီ  လမ်းကြောင်း    ၃  ကြောင်းမှာ  ကြည်းလမ်း  ၂  ကြောင်း  ၊  ရေလမ်း   ၁   ကြောင်း  ပါဝင်ပါတယ်  ..  ။   
👉🏻   ကြည်းလမ်း (၁) က  မန်းလေး-ရွှေဘို-အင်းတော်- ကချင်  လမ်း  ဖြစ်ပြီး   ကားလမ်းနဲ့ ရထားလမ်း  ပါဝင်ပါတယ်    ။   
👉🏻  ကြည်းလမ်း(၂) က  မန်းလေး- မတ္တရာ-တကောင်း-ငအိုး-ကချင်  လမ်း  ဖြစ်ပြီး   ကားလမ်းသက်သက်  ဖြစ်ပါတယ်   ။    ဒီ  ကြည်းလမ်းကြောင်း   ၂   ခုက   ဧရာဝတီမြစ်ရဲ့   အရှေ့ဖက်ခြမ်း  ၁  ခုနဲ့  အနောက်ဖက်ခြမ်း  ၁  ခု   မြစ်ကို  ခွလျက်  ဖြစ်ပါတယ်   ။ 

ရေလမ်းကတော့  (အားလုံးသိတဲ့အတိုင်း - ဧရာဝတီမြစ်ကြောင်းလမ်းပါ)  ။ 

ကဲ  ..  ဟုတ်ပါပြီ   ..  ။   ဒါ့ကြောင့်   KIA  ဟာ  ပထမဆုံး  သူ့ဆီကို  မြန်မာ့တပ်မတော်  ချီတက်တဲ့အခါ   အဓိက  အသုံးပြုမဲ့ ကြည်းလမ်း ၂  လမ်းရဲ့  ဘေးတစ်ဖက်တစ်ချက်က   မြို့တွေက  နိုင်ငံရေး  Activist  လူငယ်တွေကို  ဗမာသူပုန်အဖြစ်   အပူတပြင်း   မွေးထုတ်ပေးပါတော့တယ်   ....  ။ 
( ပြောရရင်တော့ အားနာပါတယ်  ။  နိုင်ငံရေး activist  လူငယ်တွေ ဆိုတာထက်  နိုင်ငံရေးအသိ လုံးဝ မရှိတဲ့  အသိနုံနဲ့တဲ့  ဗမာလူငယ်တွေလို့  ပြောလို့ရပါတယ် )  ။ 
ဒါ့ကြောင့်  ယနေ့   စစ်ကိုင်းသူပုန်အဖွဲ့ပေါင်းများစွာရဲ့  အဖွဲ့နာမည်တွေမှာ  ဇာတ်အဖွဲ့နာမည်တွေလိုမျိုး   ၊    သိုင်းကားထဲက  နာမည်တွေလိုမျိုး   အမည်နာမတွေက    လေ့လာသူတွေကြား  ဟာသသဖွယ်  ဖြစ်ရတဲ့အထိ  ဖြစ်ခဲ့ရပါတယ်   ။  

စကားဆက်ရရင်  -  KIA  ဟာ   သူတို့ရဲ့  သင်တန်းနည်းပြတွေကို   စစ်ကိုင်းတိုင်း   အနှံအပြား  စေလွှတ်ပြီး    အညာ ဗမာလူငယ်တွေကို  နေရာအနှံ့မှာ  ဖြစ်သလို  အရေးပေါ်လူစုပြီး   ရက်တိုစစ်ပညာတွေ  လေ့ကျင့်ပေးပါတယ်   ..   ။  စစ်ကိုင်းတိုင်း  အနှံ့အပြား ဆိုတာထက်  ဦးစားပေးအဖြစ်  မြန်မာ့တပ်မတော်ရဲ့  LOC လမ်းကြောင်းတဝိုက်   မြို့တွေရဲ့   Local  PDF  အဖွဲ့တွေဆိုရင်  ပိုမှန်ပါမယ်   ။  အခြားအဖွဲ့တွေထက်   အဲဒီအဖွဲ့တွေအပေါ်    KIA   ထောက်ပံ့မှုက  ပို အလေးသာပါတယ်  ။ 

ဗမာလူငယ်တွေကို   KIA  အဓိက  သင်ပေးလိုက်တာက    IED မိုင်း လို့ခေါ်တဲ့   လက်လုပ်မိုင်း ပြုလုပ်နည်းနဲ့  အခြေခံ လက်နက်ငယ် ပစ်ခတ်နည်းပါ  ..  ။

လက်လုပ်မိုင်း( Improvise mine) ပြုလုပ်နည်း  သင်ပေးရတဲ့  ရည်ရွယ်ချက်က   ကြည်းလမ်းကြောင်းတလျှောက်  ဥဒဟိုသွားလာ ချီတက်နေမဲ့  မြန်မာ့တပ်မတော် ယာဉ်တန်းတွေကို  အလွယ်ကူဆုံး ၊  အထိရောက်ဆုံး   ဒုက္ခပေးမဲ့နည်း ဖြစ်ပါတယ်  ။     

လက်နက်ငယ်ပစ်ခတ်နည်း  သင်ပေးရတဲ့  ရည်ရွယ်ချက်ကတော့   KIA  စက်ရုံတွေကနေ  ဗုံးပေါလအော  ထုတ်ပေးလိုက်မဲ့   Type 82  ပုံစံ  K-12  သေနတ်တွေကို  စစ်ကိုင်း  အနှံအပြား  ပျံနှံ့သွားစေမယ်  ။    ၎င်းလက်နက်တွေနဲ့   စစ်ကိုင်းလူငယ်တွေကို  သူပုန်တွေ ဖြစ်စေ  ၊  (  သူပုန်ထက် သေးရင်လည်း  ဒေသခံဓားပြတွေ ဖြစ်စေ  )   ဖြစ်သွားအောင်  ဇာတ်သွင်းလိုက်တဲ့  ဗျူဟာပါဘဲ   ..  စစ်ပညာအရ  ပျောက်ကြားစစ်ကို  လေ့ကျင့်ပေးတာ ဖြစ်ပြီး    ကျနော်တို့  စစ်သားအခေါ်  ဗန်းစကားနဲ့ ပြောရရင်  သွေးသန်းကိုက် ဗျူဟာပါဘဲ  ..  ယားကျိ ယားကျိနဲ့   အငြိမ်နေလို့ မရအောင်  လုပ်ထားတဲ့  ဗျူဟာပါဘဲ  ..  ။  

လက်နက်ငယ်တွေဆိုတာ   လူထုကြား  ပျံနှံ့ပြီးသွားရင် အလွန် လိုက်သိမ်းရ  ခက်ခဲတယ် ဆိုတာ   KIA  လို  ဂျိုးကျတဲ့  အဖွဲ့မျိုးက   ကောင်းကောင်း  သဘောပေါက်ပါတယ်   ။  ဒီနည်းနဲ့   မြန်မာ့တပ်မတော်ကို  စစ်ကိုင်းမှာ   သူပုန်နှိမ်နင်းရင်း   အလုပ်များစေပြီး   သူ့ဆီ လှည့်မလာအောင်    အလုပ်ပေးထားတဲ့  သဘောပါဘဲ   ။    
ဒီလို   စစ်ကိုင်းဒေသကို   Buffer Zone  အဖြစ်  ပြောင်းလဲချင်တဲ့  အယူအဆဟာ   UWSA  ဝ တပ်ဖွဲ့ဆီက  ကူးယူထားတဲ့  အယူအဆလို့လည်း  ခန့်မှန်းလို့ ရပါတယ်   ..   ။   UWSA   ဟာ  သူ့ရဲ့  ဝ ဒေသနဲ့  အစိုးရဒေသ(တပ်) ကြားမှာ  ကြားခံ   SSPP/SSA  ဒေသကို အင်အားကောင်းအောင်  အကြီးအကျယ်  အင်အားဖြည့်တင်းပေတဲ့  ပုံစံမျိုးပါ   ..  ။   သဘောက -  မြန်မာ့တပ်မတော်ဟာ    UWSA   ဝ   နဲ့  မတိုက်သေးခင်   SSA  ဒေသကို  အရင်ထိန်းချုပ်ရမှာနဲ့ တင်   အချိန်အတော်ယူရမှာပါ  ..  ။    Buffer Zone  အယူအဆဟာ   မြန်မာ့တပ်မတော်ရဲ့  စင်ပြိုင်လက်နက်ကိုင်အဖွဲ့တွေကြား  အိမ်မက် မက်နေတာ ကြာပါပြီ   ....  ။   

ဒါမျိုး   Buffer Zone   အယူအဆကို   ရခိုင်လက်နက်ကိုင်   AA  ကလည်း  အတုခိုး  လုပ်ဆောင်လာတာကို  တွေ့ရပါတယ်   ။    ရခိုင်ကို  ချီတက်လာမဲ့   မြန်မာ့တပ်မတော်ရဲ့   Main LOC  မကွေး-အမ်း   တောင်ကြားလမ်းကို  ဖြတ်တောက်နိုင်ဖို့   အဲဒီလမ်းတဝိုက်က   Local   PDFs  အဖွဲ့တွေကို  ULA/ AA  ကပါ   ထောက်ပံ့  လေ့ကျင့်ပေးလာတာကို   ကြားရပါတယ်   ..   ။     ရခိုင်ကို  ပြည်မနဲ့  ဖြတ်တောက်ဖို့  ကြားခံ  Buffer  ထားတဲ့  သဘောပါဘဲ   ။ 

ဒါ့ကြောင့်    Buffer Zone  အယူအဆအရ    KIA  ဟာ  သူ့ဆီကို လာနိုင်တဲ့ လမ်းကြောင်း   ၃   ကြောင်း ဖြတ်တောက်နိုင်ဖို့  အဲဒီ  ပတ်လည်က   Local PDFs  တွေကို  အကြီးအကျယ် ထောက်ပံ့ခဲ့တာပါ   ...  ။   

မန္တလေး-ရွှေဘို-အင်းတော်လမ်း(ဧရာဝတီမြစ် အနောက်ဖက်ကမ်း လမ်း) မှာ ဆိုရင်   လမ်းတလျှောက်လုံးက   ရွှေဘို၊ ဝက်လက် ၊ ရေဦး ၊  ကောလင်း ၊ ဝန်းသို ၊ ကသာ   ၊ အင်းတော်   PDFs   တွေဟာ  KIA  ဆီက  သင်တန်းပို့ချမှု  ၊ ထောက်ပံ့မှု  ရပါတယ်  ..  ။    လမ်းမပေါ်  မကျပေမဲ့လည်း   စစ်ကိုင်းအတွင်းကျတဲ့   ဆားလင်းကြီးလို  ၊  ပင်လည်ဗူးလို့  နေရာတွေက   PDFs  တွေကိုလည်း   KIA   က    ထောက်ပံ့ပါတယ်  ။  
အဲဒီလို ထောက်ပံ့တဲ့ အကြောင်းအရာက   အချို့နေရာတွေက  KIA  အတွက်  သယံဇာတ အကျိုးအမြတ်တွေ  ရှိလာနိုင်တဲ့  ဒေသတွေ ဖြစ်လို့ပါဘဲ  (ဒါကို အချက်တစ်ချက် အနေနဲ့  သီးခြားရေးပါမယ် )  ။   

နောက်    မန္တလေး-မတ္တရာ- စဉ်ကူး-တကောင်း-ထီးချိုင့်-ရွှေကူ  လမ်း ( ဧရာဝတီမြစ် အရှေ့ဖက်ကမ်း လမ်း )   မှာ ဆိုရင်လည်း  ..   မတ္တရာ PDF  ၊  စဉ့်ကူး  PDF  ၊  ထီးချိုင့်  PDF   ၊   ရွှေကူ   PDF   တွေဟာ    KIA  ရဲ့  ထောက်ပံ့မှု  ပိုရပါတယ်   ..  ။   ဒီလမ်းတွေကပဲ   ဖြစ်စဉ် အစပိုင်းတွေမှာ  KIA  သေနတ်တွေ  ဥဒဟို  စီးဝင်ခဲ့ကြတာပဲ  ဖြစ်ပါတယ်   ..   ။  

နောက်   ..   ရေလမ်းခရီးမှာ ဆိုရင်လည်း   မြန်မာ့တပ်မတော်ဟာ ရေလမ်းကိုလည်း   LOC  အဖြစ် အသုံးပြုတတ်ကြောင်း   KIA   က  သဘောပေါက်ပါတယ်   ....    ။   
ဒါ့ကြောင့်   ဧရာဝတီနဲ့  ချစ်တွင်းမြစ် ဆုံရာ  မြစ်ဆုံဒေသ (  မြစ်ခြေ ၊ ပခုက္ကူ ၊ ရေစကြို ၊  မြောင်  )   ဂွဆုံက   ဗမာလူငယ်တွေကို  Local PDF တွေအဖြစ်  KIA   က   လာရောက်  လေ့ကျင့်ပေးခဲ့ပါတယ်   ..  ။   
မြန်မာ့တပ်မတော်(ရေ) Navy  Ships   တွေကို    မြင်းခြံ အနောက်ကမ်း  ဆီမီးခုံဆိပ်ကမ်းကနေ  စ လို့   ...   ဟိုး  KIA  ရှိရာ  ဗန်းဗော်အထိ    ရေလမ်းတလျှောက်လုံး   ပစ်ခတ်နှောင့်ယှက်နိုင်အောင်  လုပ်တဲ့  KIA   ဗျူဟာပါဘဲ   ...  ။    သူတို့နဲ့  မတိုက်ရသေးခင်  ..  ဗမာသူပုန်ကို  ကြားခံပေးလိုက်တဲ့   သဘောပါဘဲ   ..  ။  

ကဲ  ..  ကောင်းပါပြီ   ..  ။   မြန်မာ့တပ်မတော်ရဲ့    LOC  လမ်းကြောင်း  ၃   ခုကို  ဖြတ်တောက်ဖို့   စစ်ကိုင်းဒေသကို  ဓားစာခံ အသုံးချခဲ့တယ်ဆိုတဲ့  အကြောင်းကို  ကျနော်  အကျယ်တဝင့်  ရေးပြီးပါပြီ  ...  ။    KIA  အတွက်  အမြတ်ထွက်တဲ့  နောက်တစ်ချက်ကို   ဆက်ရေးပါမယ်   ။

(၂) အချက်  ။   ဗမာလူမျိုးစစ်စစ်တို့ရဲ့  ဘူမိနက်သန်  စစ်ကိုင်းဒေသ ဗမာလူထုနဲ့  မြန်မာ့တပ်မတော်ကို  အကြီးအကျယ်  သွေးကွဲစေသည့် ဗျူဟာ သုံးခဲ့ခြင်း 
✍🏻️✍🏻️✍🏻️✍🏻️✍🏻️✍🏻️✍🏻️✍🏻️✍🏻️✍🏻️✍🏻️
ဒီအချက်က  ရေးရတာ  နည်းနည်းတော့ တာဝန်ကြီးပါတယ်  ။   တိုင်းရင်းသား စည်းလုံးညီညွှတ်ရေးကို  ထိခိုက်စေလိုတဲ့  သဘောနဲ့  ရေးတာ (လုံးဝ) မဟုတ်ဘဲ  Logic ရှုဒေါင့်က  သုံးသပ်ပြီး  ရေးတာသာ  ဖြစ်ပါတယ်  ။   

မြန်မာ့တပ်မတော်ဟာ  ပြည်ထောင်စုတပ်မတော် အဖြစ်  ရပ်တည်ပြီး  အခြား  တိုင်းရင်းသား လူမျိုးတွေပါ   တာဝန်ထမ်းဆောင်နေသည်  ဆိုသော်ငြား   အများစုကတော့   ဗမာလူမျိုးတို့ကသာ  စစ်မှုထမ်းအဖြစ်  တာဝန်ထမ်းဆောင်နေတာ များပါတယ်   ။   အခြားတိုင်းရင်းသား  လူမျိုးတွေလည်း  တာဝန်ထမ်းဆောင်ကြပေမဲ့   %   အားဖြင့် နည်းပါတယ်    ။     ဒါ့ကြောင့်   EAOs  အဖွဲ့အတော်များများက  မြန်မာ့တပ်မတော်ကို  "  ဗမာစစ်တပ် "  လို့သာ  ရှုမြင်ကြပါတယ်  ...   ။    သူတို့  interview   တွေကို  လေ့လာရင်လည်း  သိသာမြင်သာပါတယ်  ။ 

ဒါ့ကြောင့်   ဗမာအများစု   တာဝန်ထမ်းဆောင်တဲ့  မြန်မာ့တပ်မတော်နဲ့   ဗမာလူမျိုးစစ်စစ်တွေကြား  သွေးကွဲစေပြီး  ဗမာဒေသတွေမှာပဲ   အချင်းချင်း ပြန်တိုက်ခိုင်းလို့ရတဲ့  အခွင့်အရေးဟာ   KIA  အတွက်တော့   သမိုင်းမှာ  တစ်ခါမှ   မရခဲ့ဖူးတဲ့  တကယ့် မဟာအခွင့်အရေးကြီးပါဘဲ   ..  ။   

ဒီအတွက်   ၂၀၂၁  ဖြစ်စဉ်ကြီးကို  KIA  က   ဗမာလူထုနဲ့  ဗမာလူများစု တပ်မတော်  သွေးကွဲရေးကို  ကောင်းကောင်း အသုံးချခဲ့တာပါ   ။   

KIA  အတွက်  အခြေအနေဖန်တီးနိုင်ခွင့်က   ၁၉၈၈  နဲ့   ၂၀၂၁   အခြေအနေတောင် မတူတော့ပါဘူး   ။    ၁၉၈၈  မှာလည်း   ပါဂျောင်ကို  ဗမာလူငယ်  အများအပြား ပြေးကြပြီး   သူပုန်လုပ်ကြတယ်ဆိုပေမဲ့   ABSDF  ဟာ  မြန်မာ့တပ်မတော်ကို  အံတုဖက်ပြိုင်နိုင်တဲ့  လောက်လောက်လားလား  သူပုန်အထိ   ဖြစ်မလာခဲ့ပါဘူး   ..  ။   ဒါ့အပြင်  ၁၉၈၈    KIA  ဟာ  မောင်းပြန်ရိုင်ဖယ်ကိုတောင်   သူတို့အတွက်   လောက်ငှရုံသာ  ကိုင်နိုင်တဲ့ အခြေအနေပါ   ။  ကိုယ်ပိုင်   မထုတ်လုပ်နိုင်သေးပါဘူး   ။  

ခု   ၂၀၂၁   ကျတော့ မတူတော့ပါဘူး    ..   ။    KIA  ဟာ   ဗမာလူငယ်  တအုပ်တမကြီးကို  လိုင်ဇာအထိ  တကူးတက  သင်တန်းခေါ်ပေး ၊ သူပုန်လုပ်ခိုင်းတာမျိုး   မလုပ်တော့ဘဲ    ..   သူဒေသမှာပဲ  သူနေပြီး   Type 81   မောင်းပြန်ရိုင်ဖယ်   အလက်  ရာနဲ့ချီ  ပို့ပေးလိုက်တာက  သူ့အတွက်    ပို  အလုပ်ဖြစ်ပါတယ်   ။    ၂၀၂၁   မှာကျတော့    KIA  ဟာ   မောင်းပြန်သေနတ်ကိုလည်း    ဗုံးပေါလအော  ထုတ်နိုင်တဲ့ အခြေအနေ  ရှိနေပြီလေ   ....  ။  

အဲဒီတော့  စစ်ကိုင်း  ဗမာလူငယ်ထုဟာ  သူပုန်အသစ်ကျပ်ချွတ်ကလေးတွေ အဖြစ်  ပြောင်းလဲသွားပြီး    စစ်ကိုင်းဒေသဟာ  ယမ်းခိုး  အကြီးအကျယ်  ဝေ ပါတော့တယ်   ...  ။     သူ  လေ့ကျင့်ပေးလိုက်တဲ့   ဗမာလူငယ်ထုကပဲ   ဗမာလူများစုပါဝင်တဲ့   အစိုးရတပ်မတော်ကို   အကြီးအကျယ်  ပြန်ချနေကြတာဟာ   လူမျိုးစွဲအတွေးကြီးတဲ့    KIA    အတွက်တော့  တကယ့်ကို   မဟာအောင်ပွဲပါဘဲ   ...  ။

စစ်ကိုင်းဒေသ တစ်ခုလုံးအတွက်တော့   နစ်နာဆုံးရှုံးမှုက  အရမ်းကြီးမားပါတယ်    ။  စစ်ကိုင်းဟာ   အသက်ပေါင်းများစွာ  ၊  အိုးအိမ်ပေါင်းများစွာ  ၊  ဘဝပေါင်းများစွာ   စုတ်ပြတ်သွားခဲ့ပြီး   ..   ဒါကို  ပြည်တွင်း/ပြည်ပ  ဘေးတီးသူအချို့က   Democracy  အရေး  လက်နက်ကိုင်  တိုက်ပွဲဝင်သူ  စစ်ကိုင်း သူရဲကောင်းတွေအဖြစ်   မြှောက်ပေးကြပါတယ်   ..  ။ 
ရိုးသားသူ    စစ်ကိုင်းသား  ဗမာစစ်စစ် လူငယ်ထုကလည်း  ဒါကို  ကျေနပ်သာယာကြပါတယ်   ။   သူတို့  မသိလိုက်တာတွေက  အများကြီးရယ်ပါ   ။   KIA   ကတော့   နောက်ကွယ်ကနေ   ပြုံးပြုံးကြီး  ကြည့်နေပါတယ်   ။  

ဒီအချက်ကို  မြန်မာ့တပ်မတော်ဟာလည်း   အတော်လေးကို   အချိန်ယူ  ကုစားရမယ် ထင်ပါတယ်   ...  ။    တကယ့်  Master Strategy  ချမှတ်ပြီး  တပ်နဲ့ပြည်သူကြား    ရင်ကြားစေ့အမြင်  ပြန်လည်ကုစားရေးစီမံချက်ကို  နည်းလမ်းပေါင်းစုံ  ချမှတ်လုပ်ဆောင်မှ  ရမယ် ထင်ပါတယ်   ။  အချိန်လည်း  ကြာနိုင်ပါတယ်   ။ 
နောက်ထပ်  KIA  အမြတ်ထွက်တဲ့   တတိယအချက်ကို  ကျနော်  ဆက်ရေးပါမယ်  ။  

(၃) အချက်  ။  KIA  အတွက် လှုပ်ရှားနယ်မြေ(ဝါ) ထိန်းချုပ်နယ်မြေများ ပိုမိုလာနိုင်ခြင်း   ၊  (ဒီထက်မက ထပ်တိုး သုံးသပ်ရလျှင်) စီးပွားရေးအရ  ဗျူဟာမြောက် ထိန်းချုပ်နယ်မြေများ  တိုးလာနိုင်ခြင်း  
✍🏻️✍🏻️✍🏻️✍🏻️✍🏻️✍🏻️✍🏻️✍🏻️✍🏻️✍🏻️✍🏻️✍🏻️✍🏻️✍🏻️
ဒီအချက်ကလည်း   အရေးကြီးပါတယ်   ..   ။  ဘယ် လက်နက်ကိုင်အဖွဲ့အစည်း မဆို  ငွေကြေးနဲ့ရပ်တည်ရတာ ဖြစ်ပါတယ်  ..  ။   မြန်မာပြည်ရဲ့  အမျိုးမျိုးသော လက်နက်ကိုင်တွေထဲကမှ  KIA  ဟာ  စီးပွားရေးအရ  တောင့်တင်းတဲ့   အဖွဲ့မျိုးထဲမှာ ပါဝင်ပါတယ်   ..  ။

ဘာလို့လဲဆိုတော့    KIA လှုပ်ရှားဒေသတွေထဲမှာ  သယံဇာတထွက်တဲ့  ဒေသအများအပြား   ပါဝင်နေပါတယ်   ။   ကျောက်စိမ်း  ၊  ရွှေ  ၊  ပယင်း  ၊  သတ္တု   ၊   သစ်    တရားမဝင်လမ်းကြောင်း  တွေနဲ့   KIA  ဟာ  ကြီးပွားချမ်းသာပါတယ်   ..   ။   ဒါအပြင်  ကချင်ပြည်နယ်တွင်း  ကချင်၊ ရှမ်းနီ  ဒေသခံလူထုဆီက  ရတဲ့  ဆက်ကြေးကလည်း   တစ်နှစ်တစ်နှစ်   တနင့်တပိုး  ရပါတယ်    ။  

ဒါ့ကြောင့်    ..   ဒီ   ၂၀၂၁   အရေးအခင်းကြီး  နောက်ပိုင်းမှာ  KIA  တပ်ဖွဲ့အချို့ဟာ  စစ်ကိုင်းတိုင်း ဒေသတွေထဲ အထိ   ပေါ်ပေါ်ထင်ထင်  ဝင်ရောက်လှုပ်ရှားလာတာ  ရှိပါတယ်   ..  ။   KIA  ဟာ   သူ့အတွက် မကျန်ရင်  ယင်တောင်  မရိုက်ဘူး  ဆိုသလိုပဲ  KIA   မှာ အကြောင်းရှိတယ်လို့  ယုံကြည်ရပါတယ်   ..   ။     သူ  ဝင်ရောက် လှုပ်ရှားတဲ့  စစ်ကိုင်းဒေသ တွေဟာ   သယံဇာတ  ထွက်ရှိတဲ့  နေရာတွေ  ဖြစ်ပါတယ်   ။   ပင်လည်ဗူးဒေသ  ၊  ကောလင်းဒေသ  ၊   ချင်းတွင်း အထက်ပိုင်း  ၊   မူးမြစ် အထက်ပိုင်းဒေသတွေမှာ KIA  တပ်တွေ  ဝင်ရောက်လာလို့   မြန်မာ့တပ်မတော်နဲ့  တိုက်ပွဲများ အကြီးအကျယ်  ဖြစ်ပွားခဲ့ပါတယ်   ။

စစ်ကိုင်းတိုင်း  မြောက်ပိုင်း ၊ ချင်းတွင်းမြစ် အထက်ပိုင်းက   အချို့  ခိုးတူး  ရွှေမှော်တွေ  ၊   တပိုင်တနိုင်ရေနံတွင်းတွေ  ၊   သစ် ခိုးထုတ်ရာ နေရာတွေ    ဒါတွေဟာ  အမျိုးမျိုးသော ဝင်ငွေလမ်းကြောင်းတွေနဲ့   စီးဆင်းနေပြီး   (အကယ်ရွေ့သာ)  KIA  ဟာ   ထိန်းချုပ်နယ်မြေ  တိုးလာခဲ့ရင်   Local  PDF အကူအညီနဲ့   သူရဲ့ ဝင်ငွေလည်း  တိုးပွားလာစရာလည်း  ရှိပါတယ်  ။  Local  PDF  ဆိုတာလည်း   သူဩဇာခံမို့   စစ်ကိုင်းဒေသမှာ  စီးပွားရေးအရ ဗျူဟာမြောက်အကျိုးအမြတ်တွေ   KIA  အတွက်  မက်လောက်စရာ ရှိနေပါတယ်    ။ 
​
နောက်တစ်ချက်ကတော့  များများစားစား  ကြိုမခန့်မှန်းချင်လို့   အချက်(၁)ချက်  အနေနဲ့  ခေါင်းစဉ်ဖော်  မရေးတော့ဘဲ   ..   သာမန် ခန့်မှန်းချက်အနေနဲ့သာ ရေးပါမယ်    ။     KIA   ဟာ   တရုတ်နဲ့  US  ကြားမှာ   ဗျူဟာ ခွချက်တတ်ကြောင်း   ကျနော်    Post  တွေ  ရေးခဲ့ဖူးပါတယ်   ။    ဒါ့အပြင်   KIA  ဌာနချုပ်  လိုင်ဇာဟာ   မြန်မာ့တပ်မတော် သိမ်းပိုက်ထားတဲ့  တောင်ကုန်းတွေ  ပတ်လည်ရဲ့  အောက်က   ဒယ်အိုးချိုင့်လေးမို့    လိုင်ဇာဟာ အချိန်မရွေး   အန္တရာယ်ရှိကြောင်း   KIA  လည်း  ကောင်းကောင်း  သဘောပေါက်ပါတယ်   ။ 

ဒါ့ကြောင့်  တနေ့  တရုတ်နဲ့ သူတို့  အဆင်မပြေခဲ့ရင်  ၊  မြန်မာ့တပ်မတော်က လည်း    သူတို့  ဌာနချုပ်  လိုင်ဇာကို ခြိမ်းခြောက်လာခဲ့ရင်  ဌာနချုပ်သစ် တစ်ခုကို  ပြောင်းကို   ပြောင်းရမယ်လို့   တွေးဆချက်ရှိပုံရပါတယ်   ။   သူတို့  စဉ်းစားတဲ့   ၄င်း ဌာနချုပ်သစ်ဟာ    ကချင်ပြည်နယ်ရဲ့  အခြားနေရာသစ် တစ်ခုလည်း  ဖြစ်ချင်ဖြစိမယ်   ၊   စစ်ကိုင်းတိုင်း  မြောက်ပိုင်း  နေရာတစ်ခုလည်း  ဖြစ်ချင်ဖြစ်မယ်  (  တစ်ခုခုတော့  ဖြစ်နိုင်ပါတယ် )  ။  အဲဒီတစ်ခါ   ထို ဌာနချုပ်သစ်ကို  ရံဖို့   Buffer Areas  အဖြစ်  စစ်ကိုင်းကို  ရွေးချယ်ပြီး    စစ်ကိုင်းဒေသကို  စနစ်တကျ  စစ်မီးတောက်စေခဲ့သလားလို့  တွေးစရာပါဘဲ   (ဒါကတော့  ခန့်မှန်းချက်သက်သက်ပါ၊ မှားကောင်းလည်း မှားနိုင်ပါတယ်) ။ 

မည်သို့ပင်ဆိုစေ   ..   ၂၀၂၁  အရေးအခင်းဟာ  KIA  အတွက်  အကျိုးအမြတ်ထွက်တဲ့   Master Profit ပွဲကြီးပါဘဲ   ...  ။   သေချာတာတော့   ဒီပွဲမှာ  KIA  ဝင်ပါခဲ့တာ  NUG / PDF  အတွက်လည်း   မဟုတ်ဘူး  ၊  ဒီမိုကရေစီရေးအတွက်လည်း  မဟုတ်ဘူး  ၊    သူ့အတွက်သူ   ဆိုတာတော့   လေ့လာသူတွေသာ  သိနိုင်တဲ့အချက်ပဲ ဖြစ်ပါတယ်    ..  ။  

KIA  အကျိုးအမြတ်ထုတ်သမျှ  နင့်နေအောင် ခံစားရတဲ့  ၅.၃ သန်းသော  စစ်ကိုင်းတိုင်းသူ  ၊  တိုင်းသားများ  အမြန်ဆုံး ငြိမ်းအေးချမ်းသာပြီး  ဘေးဘယာ   ဝေးကွာ ကြပါစေ  ..  ။ 

(မှတ်ချက် ။  ဒီ  post  ဟာ  စစ်ကိုင်းတိုင်းရဲ့ ပထဝီတည်နေရာတွေကို အကြမ်းဖျင်း နားလည်မှ ဖတ်ရတာ  အဆင်ပြေပါမယ် ၊  စစ်ကိုင်းတိုင်း မြေပုံနဲ့ တွဲကြည့်ပါ )

Credit.... လင်းထင်မောင်မောင်