ထိုင်းနိုင်ငံမှ ကွန်ဒိုများကို မြန်မာနိုင်ငံမှာ တရားမဝင်ရောင်းချကာ တရားမဝင် ဟွန်ဒီလုပ်ငန်းများမှ ထိုင်းနိုင်ငံကို ငွေလွှဲပြောင်းသူများကို အရေးယူ

        ထိုင်းနိုင်ငံမှ ကွန်ဒိုများကို မြန်မာနိုင်ငံတွင် တရားမဝင်ရောင်းချပြီး တရားမဝင် ဟွန်ဒီလုပ်ငန်းများမှ ထိုင်းနိုင်ငံသို့ ငွေလွှဲပြောင်းသူများကို အရေးယူဆောင်ရွက်ထားတယ်လို့ နိုင်ငံတော်စီမံအုပ်ချုပ်ရေးကောင်စီ သတင်းထုတ်ပြန်ရေးအဖွဲ့က ဒီကနေ့ထုတ်ပြန်ထားပါတယ်။

    ထိုင်းနိုင်ငံမှ ကွန်ဒိုများကို တရားမဝင်ရောင်းချပြီး တရားမဝင် ဟွန်ဒီ လုပ်ကိုင်သူများဖြစ်တဲ့ Minn Thu ကုမ္ပဏီမှ တာဝန်ရှိသူ ၂ ဦးနှင့် တရားမဝင်ဟွန်ဒီလုပ်ငန်းမှ ငွေလွှဲပြောင်း ဝယ်ယူသူ ၃ ဦးတို့အား အရေးယူထားတာဖြစ်ပါတယ်။
      နိုင်ငံတော်အစိုးအနေဖြင့် နိုင်ငံတော်ရဲ့စီးပွားရေးဖွံ့ဖြိုးတိုးတက်မှုအတွက် ဆောင်ရွက်လျက်ရှိရာတွင် ဝိသမသမား စီးပွားရေးလုပ်ငန်းရှင်အချို့က  ကိုယ်ကျိုးစီးပွားကိုသာ ရှေးရှုပြီး နိုင်ငံတော်ရဲ့စီးပွာရေး၊ ငွေကြေးဈေးကွက် ကမောက်ကမဖြစ်စေရန် ရည်ရွယ်၍ ပြည်ပနိုင်ငံရှိကွန်ဒိုတိုက်ခန်းများကို ပြည်တွင်းမှာတရားမဝင်အရောင်းအဝယ်ပြုလုပ်ခြင်း၊ လူမှုကွန်ရက်မီဒီယာများမှ ဆွဲဆောင်စည်းရုံးရောင်းချခြင်းများ၊ ‌ဆောင်ရွက်လျက်ရှိကြောင်း သတင်းရရှိသည့်အတွက် သက်ဆိုင်ရာလုံခြုံရေးအဖွဲ့အစည်းများမှ ဖော်ထုတ်ဖမ်းဆီးနိုင်ရေး ဆောင်ရွက်ခဲ့ပါတယ်။
        စုံစမ်းဖော်ထုတ်ချက်များအရ ရန်ကုန်တိုင်းဒေသကြီး ပုဇွန်တောင်မြို့နယ် ၅၁ လမ်းအထက်၊ အမှတ် (၁၅၅/၁၅၇) ၈ လွှာ၌ ရုံးခန်းဖွင့်လှစ်ထားသည့် Minn Thu ကုမ္ပဏီမှ ဒါရိုက်တာဦးအောင်ကျော်ထွန်းနှင့် အထွေထွေမန်နေဂျာ ဦးမင်းသူကျော်တို့ နှစ်ဦးသည် ထိုင်းနိုင်ငံမှ ကွန်ဒိုတိုက်ခန်းများအား ပြည်တွင်းမှာတရားမဝင်‌ရောင်းချလျက်ရှိတဲ့ သိရှိရသည့်အတွက် လုံခြုံရေးအဖွဲ့အစည်းများမှ ကုမ္ပဏီတာဝန်ရှိသူများနှင့် ဆက်စပ်တရားခံများအား ခေါ်ယူစစ်ဆေးခဲ့ပါတယ်။
     စစ်ဆေးဖော်ထုတ်ချက်များအရ Minn Thu ကုမ္ပဏီမှ ဒါရိုက်တာဦးအောင်ကျော်ထွန်းနှင့် အထွေထွေမန်နေဂျာ ဦးမင်းသူကျော် (ထွက်ပြေးတိမ်းရှောင်)တို့က ထိုင်းနိုင်ငံ၊ ဘန်ကောက်မြို့ရှိ ကွန်ဒိုတိုက်ခန်းများအား ပြည်တွင်းမှာ တရားမဝင်ရောင်းချရန် သက်ဆိုင်ရာကို သတင်းပေးပို့ ခွင့်ပြုချက်ရယူခြင်းမရှိဘဲ အရောင်းပြပွဲများကို ရန်ကုန်မြို့ ဆီဒိုးနားဟိုတယ်၌ ၂ ကြိမ်တိုင်တိုင် ပြုလုပ်ခဲ့ပါတယ်။
     ထို့ပြင် ကွန်ဒိုတိုက်ခန်း ဝယ်ယူသူများက ပေးချေတဲ့မြန်မာကျပ်ငွေများကို လက်ခံရယူပြီး ထိုင်းနိုင်ငံကို တရားမဝင်ဟွန်ဒီလုပ်ငန်းများမှ ငွေကြေးများ လွှဲပြောင်းပေးခဲ့ကြောင်း ဖော်ထုတ်တွေ့ရှိရတယ်လို့ ထုတ်ပြန်ချက်မှာဖော်ပြထားပါတယ်။
   ထို့ပြင် Minn Thu ကုမ္ပဏီမှ ရောင်းချခဲ့တဲ့ပြည်ပနိုင်ငံရှိ တိုက်ခန်းများကို တရားမဝင်
ဝယ်ယူထားတဲ့ဦးနေမျိုးဟန်၊ ဦးမင်းထွန်းနှင့် ဒေါ်မြတ်မြတ်မွန်တို့ ၃ ဦးကို မြန်မာနိုင်ငံဗဟိုဘဏ်ရဲ့ ခွင့်ပြုချက်မရှိဘဲ ထိုင်းနိုင်ငံရှိဘဏ်များတွင် တရားမဝင်ဖွင့်လှစ်ထားတဲ့ ၎င်းတို့ရဲ့ ဘဏ်ငွေစာရင်းများမှတစ်ဆင့် တိုက်ခန်းဖိုးငွေကြေးများ လွှဲပြောင်းပေးချေခဲ့ကြောင်း ဖော်ထုတ်တွေ့ရှိရပါတယ်။
    ပြည်ပနိုင်ငံများမှာ ဘဏ်ငွေစာရင်းများ တရားမဝင်ဖွင့်လှစ်ထားတဲ့ တရားခံဦးနေမျိုးဟန်၊ ဦးမင်းထွန်းနှင့် ဒေါ်မြတ်မြတ်မွန်တို့အားလည်းကောင်း ပြည်ပနိုင်ငံတွင် တရားမဝင်တိုက်ခန်း ဝယ်ယူထားသူများအား လည်းကောင်း စိစစ်ကာ ဥပဒေများနှင့်အညီ ထိရောက်စွာအရေးယူနိုင်ရေး ဆောင်ရွက်သွားမယ်လို့ဆိုပါတယ်။
      ပြည်ပနိုင်ငံများရှိ ကွန်ဒိုတိုက်ခန်းများအား အွန်လိုင်းမှတစ်ဆင့် တရားမဝင်ရောင်းချနေတဲ့အခြားကုမ္ပဏီများနှင့် ဝယ်ယူသူများအား ဆက်လက်စိစစ်ဖော်ထုတ် အရေးယူသွားမယ်လို ထုတ်ပြန်ပါတယ်။
     မိဘပြည်သူများအနေဖြင့် ထိုကဲ့သို့ တရားမဝင် ပြည်ပနိုင်ငံရှိ တိုက်ခန်းအရောင်းအဝယ်
ပြုလုပ်နေသူများကို သိရှိပါက သက်ဆိုင်ရာလုံခြုံရေးအဖွဲ့အစည်းများထံ လျှို့ဝှက်စွာ သတင်းပေးပို့ပါရန် အသိပေး ထုတ်ပြန်ထားပါတယ်။