ဘုရင့်မိသားစု ရှယ်ယာပိုင် MCL ဘိလပ်မြေစက်ရုံကို အယ်စေးဝါးတို့ ဖျက်ဆီးခဲ့ခြင်းအတွက် ဘတ်သန်းရာချီ လျော်ကြေးပေးရန် KNU ထံ ထိုင်းက စာပို့သတိပေးထား


ထိုင်းဘုရင့်မိသားစု ရှယ်ယာပိုင်ဆိုင်သော SCG လုပ်ငန်းစု၏ မွန်ပြည်နယ် ကျိုက်မရောမြို့နယ်အတွင်းမှ MCL ဘိလပ်မြေစက်ရုံပိုင်ပစ္စည်းများကို KNLA-PDF မှ အယ်စေးဝါး အလွဲသုံးစားလုပ်ခဲ့မှုကိစ္စအတွက် လျော်ကြေးငွေရလိုကြောင်း KNU ထံ ထိုင်းတာဝန်ရှိသူများက ဆက်သွယ်သတိပေးထားကြောင်း သတင်းရရှိသည်။

ကျိုက်မရောမြို့နယ် ချောင်းနှစ်ခွဒေသ တိုက်ပွဲများအတွင်း၌ အယ်စေးဝါးဦးဆောင်သည့် KNLA-PDF အဖွဲ့များက ထိုင်းလုပ်ငန်းစုပိုင် MCL(Mawlamyine Cement Limited) ဘိလပ် မြေလုပ်ငန်းသုံး ပစ္စည်းများကို ပုံစံမျိုးစုံဖြင့် ခိုးယူသယ်ဆောင်ခြင်း၊ ရောင်းချပစ်ခြင်းအပါအဝင် အလွဲသုံးစားလုပ်ရပ်များ ကျုးလွန်ခဲ့သည်ဟုသိရသည်။ ယင်းအတွက်ကြောင့် ထိုင်းကုမ္ပဏီဘက်က ထိုင်းအာဏာပိုင်များထံ တိုင်ကြားခဲ့ခြင်းဖြစ်ပြီး ထိုင်းအာဏာပိုင်များကလည်း အယ်စေးဝါးကို အရေးယူပေးနိုင်ရေးနှင့် လျော်ကြေးပြန်လည်ရရှိရေးအတွက် KNU ထံ တိုင်ကြားခဲ့ခြင်းဖြစ်ကြောင်း သိရသည်။

‘စာထုတ်ပြီးတော့ကို လျော်ကြေးတောင်းတာလို့ သိရတယ်။ ဘတ်သန်း(၄၀ဝ) တောင်းတယ်လို့ ကြားတာ။ အယ်စေးဝါးက လာရှင်းရမှာကို မရှင်းနိုင်ဘဲ တိုက်ပွဲသွားနေရသလိုလို ဟိုဟာလုပ်သလိုလို ဒီဟာလုပ်သလိုလိုနဲ့ ရှောင်ပြေးနေတယ်လို့ သိရတယ်။ မရှင်းနိုင်ရင်တော့ KNU က တာဝန်ခံရတော့မယ်’ ဟု ကရင်အခြေစိုက်သတင်းရင်းမြစ်တစ်ဦးက ပြောသည်။

KNU ဗဟိုအနေဖြင့် ယင်းကိစ္စအတွက် အယ်စေးဝါးကို ဆင့်ခေါ်မှုများ အကြိမ်ကြိမ်ပြုလုပ်ထားသော်လည်း အယ်စေးဝါးက ရှောင်ပြေးနေခြင်းမျိုးဖြစ်ကြောင်း၊ အယ်စေးဝါးဘက်က ရှင်းလင်းမပေး နိုင်ပါက KNU ထိပ်ပိုင်းခေါင်းဆောင်များ၏ ပိုင်ဆိုင်မှုများ မလုံမခြုံဖြစ်ရမည်ကိုလည်း စိုးရိမ်နေကြ ကြောင်းသတင်းရင်းမြစ်က အတည်ပြုသည်။ အယ်စေးဝါး ဦးဆောင်သောအဖွဲ့က ချောင်းနှစ်ခွတိုက်ပွဲကို ဆင်နွှဲနေစဉ်အတွင်း MCL ဘိလပ်မြေစက်ရုံဘက်သို့ မကြာခဏ သွားရောက်၍ စက်ရုံသုံးကားများ၊ ဘက်ဟိုးများ၊ ကွန်ပျူတာများနှင့် အခြားသော ရောင်းချ၍ရနိုင်သည့်ပစ္စည်းများစွာကို အကြိမ်ကြိမ် အင်အားသုံး ရယူသွားကြောင်းသိရသည်။ အင်အားသုံးရယူသွားခြင်းကို အယ်စေးဝါးတို့ဘက်က တိုက်ပွဲ ကြောင့် ထိခိုက်မည်စိုးသဖြင့် ခေတ္တနေရာရွှေ့ထားပေးခြင်းဖြစ်သည်ဟု အကြောင်းပြခဲ့ကြောင်းလည်း သိရသည်။ သို့သော်ယူဆောင်သွားသော ပစ္စည်းများအားလုံးကို ပြန်လည်ပေးအပ်ခြင်း လုံးဝမရှိခဲ့ဟု ဆိုသည်။

“အယ်စေးဝါးက တပ်မဟာ(၆)ကိုလည်း မသွားရဲဘူး။ ဘုရားသုံးဆူလည်း မသွားရဲဘူး။ KNU ကလည်း ထိုင်းဘက်က သတိပေးခံထားရတယ်တဲ့။ မရှင်းပေးနိုင်ရင် ထိုင်းဘက်မှာရှိတဲ့ ကရင်လက်နက် ကိုင်ခေါင်းဆောင်တွေရဲ့ပိုင်ဆိုင်မှုတွေ အသိမ်းခံရမယ်လို့ သတိပေးထားတာ။ တပ်မဟာ(၆)က အယ် စေးဝါးကို လာရှင်းဖို့ ခေါ်တယ်။ သူကပတ်ပြေးနေတယ်” ဟု သတင်းရင်းမြစ်က ပြောသည်။ ထိုင်းဘက်ခြမ်းတွင်မူ MCL ဘိလပ်မြေကိစ္စအပြင် ထိုင်းနယ် စပ်လုပ်ငန်းရှင်များ၏ အကျပ်အတည်းအတွက် အကြိတ်အနယ်ဆွေးနွေးမှုများ လုပ်ဆောင်နေကြပြီဖြစ်ကြောင်း သိရသည်။ အထူးသဖြင့် မြန်မာဘက်ခြမ်းသို့ ကုန်ပစ္စည်းတင်ပို့ရောင်းချနေသော လုပ်ငန်းရှင်များက ထိုင်းလွှတ်တော်အတွင်းသို့ အသိပေးမှုများလုပ်ဆောင်၍ မြန်မာဘက်ခြမ်းတည်ငြိမ်းအေးချမ်းမှုရှိစေရေးအတွက် လုပ်သင့်လုပ်ထိုက်သောဆုံးဖြတ်ချက်များ ချမှတ်ပေးရန် တွန်းအားပေးထားသည်ဟု သိရသည်။

“တပ်မဟာ(၆)ကို ထိုင်းဘက်က အော်ကျောလန်ဖြစ်နေတယ်။ တပ်မဟာ(၇)ကိုတော့ ညှိ လို့ရတယ်။ ထိုင်းကုန်စည်တွေ ဒီဘက်ကို ဖြတ်သန်းဖို့ ကိစ္စမှာ ထိုင်းလုပ်ငန်းရှင်တွေ အသံထွက် လာတော့ ထိုင်းရဲတွေက အလုပ်နည်းနည်းလုပ်ပြလာကြတယ်”ဟု ထိုင်းသတင်းရင်းမြစ်တစ်ဦးက ပြောသည်။ အယ်စေးဝါး၏ အလွဲသုံးစားလုပ်မှုများနှင့် ပတ်သက်လျှင်လည်း KNU ထက် KTLA မှ နယ် ဒါးမြတွင်သာ တာဝန်ပိုရှိကြောင်း ၎င်းက ဆိုသည်။ ထိုင်းအာဏာပိုင်များကမူ အယ်စေးဝါး၏လုပ်ရပ် အတွက် မည်သည့်နေရာတွင် နေထိုင်သည် မသေချာသော နယ်ဒါးမြထက် နေရာဌာနသေချာသော KNU ထံသို့သာ ဆက်သွယ်ခြင်းဖြစ်နိုင်သည်ဟု ပြောသည်။

“ကရင်ခေါင်းဆောင်တွေရဲ့ပိုက်ဆံတွေ သိမ်းမယ်ဆိုရင် လွယ်လွယ်လေးပါပဲ။ ထိုင်းဘဏ် တွေမှာတော့ သူတို့ပိုက်ဆံတွေ အများကြီးပဲ။ သူတို့ရဲ့ပတ်သက်မှုတွေက ရှုပ်ထွေးတယ်၊ နက်နဲတယ်။ တစ်ခုရှိတာက ထိုင်းဘုရင့်မိသားစု ရှယ်ယာပါတဲ့လုပ်ငန်းကို သွားလုပ်တာကတော့ ကိုယ့်သေတွင်း ကိုယ်တူးတာပဲ” ဟု ထိုင်းသတင်းရင်းမြစ်က ပြောသည်။

ကျိုက်မရောမြို့နယ် ကဒုံစိကျေးရွာအနီးရှိ မော်လမြိုင်ဘိလပ်မြေစက်ရုံ (MCL) သည် Pacific Link Cement Industries Ltd နှင့် Saim Cem ent Group (SCG) တို့က ၂၀၁၄ ခုနှစ်ကတည်းက စတင်၍ ဒေါ်လာသန်း(၄၀ဝ)ခန့် အကုန်အကျခံ ရင်းနှီးမြှုပ်နှံတည်ထောင်ခဲ့ခြင်းဖြစ်ပြီး တစ်ရက်တန် (၅၀ဝဝ) အထိထုတ်လုပ်သွားရန် ရည်မှန်းထားသော လုပ်ငန်းမျိုးဖြစ်ကြောင်း သိရသည်။

Post a Comment

Previous Post Next Post