နျူကလီးယားစွမ်းအင်အသုံးပြုရေး၊ ရေနံနှင့် ရေနံထွက်ပစ္စည်းများ တင်ပို့ရေး မြန်မာနှင့် ရုရှား ဆွေးနွေး

 ရုရှား ဖက်ဒရေးရှင်း နိုင်ငံကို ရောက်ရှိနေတဲ့ လျှပ်စစ်နှင့် စွမ်းအင်ဝန်ကြီးဌာန ပြည်ထောင်စုဝန်ကြီး ဦးသောင်းဟန်ဟာ ရုရှားနိုင်ငံရဲ့ ROSATOM State Nuclear Energy Corporation ညွှန်ကြားရေးမှူးချုပ်ဖြစ်တဲ့ Mr. Alexey Likhachev နှင့် တွေ့ဆုံပြီး နျူကလီးယား စွမ်းအင်ကိစ္စ ဆွေးနွေးခဲ့တယ်လို့  နစက က သတင်းထုတ်ပြန်ပါတယ်။

ရိုဆာတမ် နိုင်ငံနျူကလီးယား စွမ်းအင် ကော်ပိုရေးရှင်းရဲ့ ညွှန်ချုပ်က ရုရှားနိုင်ငံမှာ နျူကလီးယားစွမ်းအင်နည်းပညာ အသုံးပြုပြီး စက်ပစ္စည်းတွေ ထုတ်လုပ်ဆောင်ရွက်နေတာတွေ၊ နျူကလီးယားစွမ်းအင်အသုံးပြုမှုနှင့် စပ်လျဉ်း၍ လိုအပ်တာတွေ ရှင်းလင်းပြောကြားခဲ့တယ်လို့ သတင်းထုတ်ပြန်ပါတယ်။

မြန်မာဝန်ကြီးကလည်း မြန်မာနိုင်ငံရဲ့ လျှပ်စစ်ဓာတ်အားသုံးစွဲနိုင်မှု အခြေအနေတွေကို ပြန်လည်ရှင်းလင်းဆွေးနွေးခဲ့ကြောင်း သတင်းမှာဖော်ပြထားပါတယ်။

ဝန်ကြီးဦးသောင်းဟန်ဟာ ရေနံထွက်ပစ္စည်းများထုတ်လုပ်ရေး၊ တင်သွင်းရောင်းချရေးနှင့် ရေနံချက် စက်ရုံတည်ဆောက်ရေးဆိုင်ရာ ကိစ္စရပ်တွေကိုလည်း ဆွေးနွေးခဲ့ကြကြောင်းလည်း သိရပါတယ်။

လျှပ်စစ်စွမ်းအားဝန်ကြီးဌာနနှင့် စွမ်းအင်ဝန်ကြီးဌာန၊ ဝန်ကြီး ဦးသောင်းဟန်နှင့် ကိုယ်စားလှယ်အဖွဲသည် Sigma LLC Co., Ltd. မှ Deputy Director General for Foreign Economic Relations ဖြစ်သူ Mr. Rodionov Nikita အားလက်ခံတွေ့ဆုံ၍ ရေနံထွက်ပစ္စည်းများထုတ်လုပ်ရေး၊ တင်သွင်းရောင်းချရေးနှင့် ရေနံချက်စက်ရုံ တည်ဆောက်ရေးဆိုင်ရာ ကိစ္စရပ်များနှင့် စပ်လျဉ်း၍ ဆွေးနွေးခဲ့ကြပါတယ်။

ဝန်ကြီးနှင့်အဖွဲ့သည် ရုရှားဖက်ဒရေးရှင်းနိုင်ငံ၏ ဒုတိယဝန်ကြီးချုပ်နှင့်စွမ်းအင် ဝန်ကြီးဖြစ်သူ H.E. Mr. SHULGINOV Nikolay ဦးဆောင်သောအဖွဲ့နှင့် လည်းတွေ့ဆုံဆွေးနွေးခဲ့ပါတယ်။ ယင်းသို့တွေ့ဆုံရာတွင် ရုရှားနိုင်ငံစွမ်းအင်ဝန်ကြီးဌာန၊ ဒုတိယဝန်ကြီး Mr. SOROKIN Pavel လည်း ပါဝင်တက်ရောက်ခဲ့ပြီး Mr. SHULGINOV Nikolay က ရုရှားနိုင်ငံအနေဖြင့် မြန်မာနိုင်ငံနှင့် စွမ်းအင်ဆိုင်ရာ ကိစ္စရပ်များတွင် ပိုမိုပူးပေါင်းဆောင်ရွက်နိုင်ရန် မျှော်လင့်ကြောင်း၊ ရေနံရှာဖွေတူးဖော်ရေးလုပ်ငန်းများ၌ ရုရှားကုမ္ပဏီများ ပါဝင်ဆောင်ရွက်နေမှုများနှင့် ရေနံနှင့်ရေနံထွက်ပစ္စည်းများ တင်ပို့ရေးနှင့် လျှပ်စစ်ဓာတ်အားပေးစက်ရုံ တည်ဆောက်ရေးဆိုင်ရာ ကိစ္စရပ်များကို ဆွေးနွေးခဲ့ပြီး ဝန်ကြီးက မြန်မာနိုင်ငံအတွက် စက်သုံးဆီနှင့်လျှပ်စစ်ဓာတ်အား လိုအပ်ချက်များကို ရှင်းလင်းပြောကြားခဲ့ပါတယ်။ 

ymg-mnn

#Yangon_Media_Group