ပဲ့ထိန်းဒုံး အများအပြားအား တိုင်ဝမ်၏ အရှေ့မြောက်နှင့် အနောက်တောင် ကမ်းရိုးတန်းများအား ကျော်လွန် ပစ်ခတ်ခဲ့သည်။ ၎င်းပစ်ခတ်မှုများသည် ကျည်စစ်ကျည်မှန်ဖြင့် ပစ်ခတ်လေ့ကျင့်မှုများ၏ တစိတ်တပိုင်းဖြစ်ပြီး ဒေသတွင်း အကြီးမားဆုံးလေ့ကျင့်ခန်းလည်း ဖြစ်သည်။ သတ်မှတ် ပစ်မှတ်အားလုံးအား ထိမှန်ကြောင်း တရုတ်ကာကွယ်ရေးဝန်ကြီးဌာနက ထုတ်ပြန်ထားသည်။
ရေပြင်နှင့် ဝေဟင် လေ့ကျင့်ခန်းနယ်မြေများအနက် အချို့မှာ တိုင်ဝမ်က ၎င်းတို့ ပိုင်နယ် ရေပြင်အဖြစ်သတ်မှတ်ထားသော ရေမိုင် ၁၂ မိုင်အတွင်း ကျရောက်နေသည်။ဤသည်မှာ တိုင်ဝမ်ကျွန်းသည် တရုတ်၏ အစိတ်အပိုင်းဖြစ်ကြောင်း တရုတ်တို့က ပြသခြင်းဟု ယူဆပါသည်။ မြေပုံအရ တိုင်ဝမ်ကျွန်းအား ရေပြင်နှင့် ဝေဟင်တို့မှ ပူးတွဲပိတ်ဆို့ခြင်းနှင့် တရုတ်ပြည်မကြီးမှ ဒုံးပျံများဖြင့် ပစ်ခတ်ခြင်းများ ပြုလုပ်မည့် အနေအထားဖြစ်သည်။
J-20 ရေဒါပျောက်တိုက်လေယာဉ်များနှင့် DF-17 အသံလွန်ဒုံးပျံများကဲ့သို့ တရုတ်၏ အဆင့်မြင့်ဆုံးလက်နက်များလည်း ပါဝင်လာနိုင်သည်။ သမားရိုးကျ ပဲ့ထိန်းဒုံးများအား တိုင်ဝမ်ကျွန်းပေါ် ဖြတ်ကျော် ပစ်ခတ်ခြင်းသည် ယခင်က မရှိခဲ့ဘူးပဲ၊ သမိုင်းစဉ်တစ်လျှောက် ပထမဆုံးအကြိမ်လည်း ဖြစ်သည်။
လေ့ကျင့်ခန်းများ၏ အဓိကရည်ရွယ်ချက်မှာ တိုင်ဝမ်းကျွန်းအား ရေပြင်နှင့် ဝေဟင် ပူးတွဲပိတ်ဆို့ခြင်း၊ ပင်လယ်ပြင်ပစ်မှတ်များအား ချေမှုန်းခြင်း၊ မြေပြင်ပစ်မှတ်များအား တိုက်ခိုက်ခြင်း၊ ဝေဟင်ထိန်းချုပ်မှု စစ်ဆင်ရေးနှင့် တပ်များ ပူးပေါင်းစစ်ဆင်ရေး စွမ်းရည်များ စသည်တို့အား စစ်ဆင်ရေးတွင် မည်သို့ အသုံးချနိုင်မည်ကို စမ်းသပ်ခြင်းဖြစ်သည်ဟု တရုတ်ပြည်သူ့လွတ်မြောက်ရေးတပ်မတော် အရှေ့ပိုင်း စစ်နယ်ဝှမ်း ကွပ်ကဲမှုဌာနချုပ်က ထုတ်ပြန်ထားသည်။
လေ့ကျင့်ခန်းတွင် ပါဝင်သောတပ်များမှာ တရုတ်ပြည်သူ့လွတ်မြောက်ရေးတပ်မတော် အရှေ့ပိုင်း စစ်နယ်ဝှမ်း ကွပ်ကဲမှုဌာနချုပ်အောက်ရှိ
- ရေတပ် (PLAN)
- လေတပ် (PLAAF)
- ဒုံးပျံတပ်ဖွဲ့ (Rocket Force)
- မဟာဗျူဟာ အထောက်အကူပြုတပ်ဖွဲ့ (The Strategic Support Force) (PLASSF သည် တရုတ်ပြည်သူ့လွတ်မြောက်ရေးတပ်မတော်၏ ပဥ္စမမြောက်လက်ရုံးတပ်ဖွဲ့ဖြစ်ပြီး အာကာသ၊ ဆိုင်ဘာနှင့် အီလက်ထရောနစ်စစ်ဆင်ရေးဆိုင်ရာ တပ်ဖွဲ့ကြီး ဖြစ်သည်။) နှင့်
- ထောက်ပံ့ပို့ဆောင်ရေးတပ်ဖွဲ့ (Logistic Support Force) တို့ ဖြစ်သည်။
အရှေ့ပိုင်း စစ်နယ်ဝှမ်း ကွပ်ကဲမှုဌာနချုပ် (PLA Eastern Theater Command) သည် တိုင်ဝမ်ကျွန်းနှင့် အနီးဆုံးတွင်ရှိသော ကွပ်ကဲမှုဌာနချုပ်ဖြစ်ပြီး အမှန်တကယ် တက်ရောက်သိမ်းပိုက်ပါက ၎င်း၏ ကွပ်ကဲမှုအောက်တပ်များက အဓိကပါဝင်မည် ဖြစ်သည်။
လေ့ကျင့်ခန်းများအပြီး ခွင့်ကြုံပစ်မှတ်အဖြစ် ဝင်ရောက်သိမ်းပိုက်ရန် ရာခိုင်နှုန်းနည်းပါးသော်လည်း ရေပြင်နှင့် ဝေဟင်ပိတ်ဆို့မှု (Joint Blockade) ဆက်လက် ပြုလုပ်နိုင်သည်ဟု သုံးသပ်ပါသည်။
နိုင်ဆွေဦး
#NaingSweOo
Source: PRC Ministry of National Defence, South China Morning Post, CNN and BBC
Post a Comment