၂၀၁၉ ခုနှအတွက် ရုပ်ရှင်အကယ်ဒမီ ဆန်ကာတင်စာရင်းတွင် ပါဝင်သည့် ရုပ်ရှင်ဇာတ်ကားပေါင်း (၂၉) ကားကို အကယ်ဒမီရွေးချယ်ရေးအဖွဲ့က ထုတ်ပြန်ထားပြီး အဆိုပါ စာရင်းထဲတွင် ပုဒ်မ ၅၀၅ ဖြင့် တိမ်းရှောင်နေရသည့် သရုပ်ဆောင်များ ၊ ဒါရိုက်တာများနှင့် ထောင်ဒဏ်ကျခံနေရသည့် သရုပ်ဆောင်များ ၊ ဒါရိုက်တာများ၏ ဖန်တီးမှု ဇာတ်ကားများ ပါဝင်နေကြောင်း သိရသည်။
မြန်မာ့ရုပ်ရှင် ထူးချွန်ဆုရွေးချယ်ရေးအဖွဲ့၏ ထုတ်ဖော်ပြောကြားလာသည့် အချက်အလက်များအရ ၂၀၁၉ ခုနှစ်တွင် ရုံတင်ပြသခဲ့သည့် ရုပ်ရှင်ဇာတ်ကားပေါင်း (၉၇) ကားအနက်မှ ပထမအကြိမ် အကဲဖြတ် ကြည့်ရှုပြီး ဆန်ကာတင် (၂၉) ကားကို စီစစ်ရွေးချယ်ခဲ့ခြင်း ဖြစ်ကြောင်း သိရသည်။
အဆိုပါ ဆန်ကာတင် (၂၉) ကားတွင် အကယ်ဒမီ ကျော်သူ ပါဝင်သရုပ်ဆောင်ထားသည့် "ကျောမှာဂဠုန် ရင်မှာနဂါး" ၊ " ၁၀၁၄" ၊ အကယ်ဒမီ မင်းမော်ကွန်း ပါဝင်သရုပ်ဆောင်ထားသည့် " နိုင်ငံကြီးသား" ၊ " ထာဝရထက် နှစ်ဆ" ၊ သရုပ်ဆောင် ဒေါင်း ပါဝင်သရုပ်ဆောင်ထားသည့် "၁၀၁၄"၊ " လိပ်ပြာစံအိမ်" ၊ "ဒဏ္ဍာရီမိုး"၊ ဒါရိုက်တာ ကိုပေါက် ရိုက်ကူးထားသည့် " ရိုးမပေါ် ကျတဲ့မျက်ရည်" ၊ သရုပ်ဆောင် ဇာဏ်ခီ ပါဝင် သရုပ်ဆောင်ထားသည့် " ထာဝရ နှောင်ကြိုး" ၊ သရုပ်ဆောင်ဖွေးဖွေး ပါဝင် သရုပ်ဆောင်ထားသည့် " သူစိမ်းအိမ်" ၊ " လှပ်၍ - လွင့်သော" ၊ " ပပဝတီ စီရင်ခန်း" ၊ " ကြာတော့သည်လည်း မောင့်စကား" ၊ သရုပ်ဆောင် ပိုင်ဖြိုးသု ပါဝင်သရုပ် ဆောင်ထားသည့် " ထာဝရ နှောင်ကြိုး" စသည့် ဇာတ်ကားများ ပါဝင်နေကြောင်း သိရသည်။
ထို့အပြင် ထောင်ဒဏ်ကျခံနေရသည့် သရုပ်ဆောင် ရဲတိုက် ပါဝင်သရုပ်ဆောင်ထားသည့် "ဒဏ္ဍာရီမိုး" ဇာတ်ကားသည်လည်း အကယ်ဒမီ ဆန်ကာတင် ဇာတ်ကား (၂၉) ကားစာရင်းတွင် ပါဝင်ကြောင်း မြန်မာ့ရုပ်ရှင် ထူးချွန်ဆုရွေးချယ်ရေးအဖွဲ့ထံမှ သိရသည်။
အဆိုပါ မြန်မာ့ရုပ်ရှင် အကယ်ဒမီဆု ပြန်လည်ချီးမြှင့်မည့် အစီအစဉ်နှင့် ပတ်သက်၍ မြန်မာနိုင်ငံ ရုပ်ရှင်အစည်းအရုံးမှ တာဝန်ရှိသူတစ်ဦးဖြစ်သည့် ဒါရိုက်တာ ပန်းချီစိုးမိုးနှင့် ပေါ်ပြူလာနယူး(စ်) ၏ သီးသန့် မေးမြန်းခန်းတစ်ခုတွင် ၎င်းက ယခုလို ပြောကြားထားသည်။
" နိုင်ငံရေးက နိုင်ငံရေးသမားတွေ လုပ်လိမ့်မယ်။ ကျွန်တော်တို့ အလုပ်မဟုတ်ဘူး ။ ကျွန်တော်တို့က အနုပညာသမား ၊ အနုပညာအလုပ်ပဲ လုပ်မယ်။ အကယ်ဒမီပေးပွဲဟာ ဖြစ်သင့်ဖြစ်ထိုက် လုပ်သင့်လုပ်ထိုက်လို့ လုပ်ဖြစ်တာပါ။ ရုပ်ရှင်လောကရဲ့တိုးတတ်ရာ တိုးတတ်ကြောင်း ပျက်ပြီးပျောက်သွားတာမျိုး မဖြစ်အောင် ကျွန်တော်တို့မှာ တာ၀န်ရှိပါတယ်" ဒါရိုက်တာ ပန်းချီစိုးမိုး က ပေါ်ပြူလာနယူး(စ်) သို့ ပြောကြားထားသည်။
ပရိုဂျူဆာတစ်ဦးက"အနုပညာရှင်တွေအပြင်အတတ်ပညာရှင်တွေလည်းမနစ်နာစေချင်လို့ အကယ်ဒမီစိစစ်ကြည့်ရှုဖို့သဘောတူခဲ့တာ"ဟုဆိုသည်။
လက်ရှိတွင် အကယ်ဒမီဆု ရွေးချယ်ရေးအဖွဲ့အနေဖြင့် ဆန်ကာတင်ဇာတ်ကား (၂၉) ကားကို ဒုတိယအကျော့ အနေဖြင့် ကြည့်ရှု အကဲဖြတ်လျက်ရှိကြောင်းလည်း သိရသည်။
မြန်မာ့ရုပ်ရှင် ထူးချွန်ဆုချီးမြှင့်ပွဲ (အကယ်ဒမီပေးပွဲ) အခမ်းအနားကို ပြီးခဲ့သည့် ၂၀၁၉ ခုနှစ်က စတင်ကာ ကိုဗစ် ၁၉ ကပ်ရောဂါ ထိန်းချုပ်ကာကွယ်ရေး စည်းမျဉ်းများအရ ရပ်နားထားခဲ့ခြင်းဖြစ်ပြီး ယခုနှစ်တွင် ပြန်လည်ကျင်းပရန် ပြင်ဆင်နေကြခြင်းလည်း ဖြစ်သည်။
#PopularNewsJournal
Post a Comment